ДЗЕНЬ ТЭАТРА ў КОЛАСАЎСКІМ ТЭАТРЫ
![](https://kolastheatre.by/sites/default/files/super_im_files/balnica-vyalikaya-1_1.jpg)
Традыцыйна Міжнародны дзень тэатра святкуецца першым паказам новага спектакля. На вялікай сцэне Коласаўскага тэатра адбылася прэм’ера драматычнай камедыі «Бальніца на краі свету» па п’есе сучаснага балгарскага драматурга Хрысты Бойчава. А за гадзіну да спектакля адбыўся ўрачысты сход тэатра, прысвечаны святу.
З Міжнародным днём тэатра коласаўцаў віншавалі дырэктар тэатра Аляксандр Старых, мастацкі кіраўнік Міхась Краснабаеў, загадчык трупы Святлана Дашкевіч, кіраўнік літаратурна-драматычнай часткі Алесь Замкоўскі, артысткі, вядучыя майстры сцэны Наталля Аладка і Святлана Жукоўская. Вядома, што былі і ўзнагароды. Ганаровай граматай Міністэрства культуры Рэспублікі Беларусь узнагароджаная артыстка, вядучы майстар сцэны Валянціна Багданава, Ганаровымі граматамі тэатра імя Якуба Коласа - інжынер па гукавым абсталяванні Алена Пракоф’ева, гукарэжысёр Міхаіл Рудак і спецыяліст па закупках Кацярына Дзіканава.
Непасрэдна перад пачаткам спектакля Міхась Краснабаеў уручыў запрашальныя квіткі гледачам, якія прымалі ўдзел у традыцыйным розыгрышы на прэм’еру.
А потым - адбылася драматычная камедыя. Поўная зала гледачоў шчыра рэагавала смехам і апладысментамі. Дзякуй усім, хто далучыўся да святкавання разам з Коласаўскім тэатрам!
Добавить комментарий