«СЦЭНІЧНЫЯ ЧЫТАННІ «ШКОЛЬНЫ ТЭАТР» У 28-ы РАЗ!

17.04.2025

21 і 22 красавіка ў 28-ы раз у Нацыянальным акадэмічным драматычным тэатры імя Якуба Коласа пройдзе заключны этап гарадскога конкурсу «Сцэнічныя чытанні «Школьны тэатр». Арганізатары - Коласаўскі тэатр, аддзел па адукацыі і аддзел ідэалагічнай работы і па справах моладзі Віцебскага гарадскога выканаўчага камітэта.

У першы конкурсны дзень 10 школьных тэатральных калектываў пакажуць на камернай сцэне тэатра імя Якуба Коласа свае лепшыя спектаклі па творах беларускіх пісьменнікаў. Якуб Колас і Ян Баршчэўскі, Янка Купала і Уладзімір Караткевіч, Алесь Петрашкевіч і Аляксей Дудараў, Галіна Васілеўская і Ягор Конеў... Іх творы прагучаць з коласаўскай сцэны ў разуменні сённяшніх юных беларусаў.

Другі дзень адбудзецца ўрачыстае закрыццё конкурсу. Пачнецца яно выступленнем на вялікай сцэне тэатра гасцей са сталіцы. Студэнты вучэбнага тэатра Беларускага дзяржаўнага ўніверсітэта культуры і мастацтваў пакажуць спектакль па класічнай п'есе Аляксандра Астроўскага «Жаніцьба Бальзамінава». Потым адбудзецца падвядзенне вынікаў конкурсу і ўручэнне ўзнагарод.

У гэтым годзе ўзначальвае журы заключнага этапа Канстанцін Ганчароў, мастацкі кіраўнік тэатра імя Якуба Коласа. Ад тэатра таксама працуюць у журы - артысты Міхаіл Асанаў і Ілля Блыкін. Ад аддзела адукацыі гарвыканкама - Ала Плюскевіч, метадыст Віцебскага гарадскога цэнтра дадатковай адукацыі дзяцей і моладзі.  Ад Віцебскага дзяржаўнага каледжа культуры і мастацтваў - Аляксандр Маханькоў, выкладчык акцёрскага майстэрства. Ад Беларускага саюза тэатральных дзеячаў - старшыня Віцебскай абласной арганізацыі Таццяна Ліхачова, вядучы майстар тэатра імя Якуба Коласа, заслужаная артыстка  Рэспублікі Беларусь.

Шчыра запрашаем усіх аматараў мастацтва
на выступленні віцебскіх школьных тэатраў!
Уваход вольны!