ГАСТРОЛІ КАМЕРНАГА ДРАМАТЫЧНАГА ТЭАТРА НА КОЛАСАЎСКАЙ СЦЭНЕ

5 і 6 сакавіка на коласаўскай сцэне адбудуцца гастролі Камернага драматычнага тэатра (г.Мінск). Госці пакажуць два спектаклі. Па жанру – гэта камедыі становішчаў.

5 сакавіка (18:00) увазе віцебскіх гледачоў камедыя англійскага драматурга Робіна Хоўдана «ШЫКОЎНАЕ ВЯСЕЛЛЕ».

Пагадзіцеся, што самы важны дзень у жыцці кожнага чалавека — гэта яго шыкоўнае вяселле.

Вось і галоўны герой быў упэўнены ў гэтым роўна да таго моманту, пакуль у дзень вяселля не прачнуўся поруч з незнаёмай аголенай дзяўчынай. Вось-вось павінна прыйсці нявеста і іншыя госці, а ён абсалютна нічога не помніць! Як выратаваць яго шыкоўнае вяселле? На дапамогу няўдачліваму жаніху прыходзіць шафер, яго дзяўчына і нават пакаёўка. Але галоўны герой і ўявіць не мог, якія сакрэты хаваюць іншыя госці шыкоўнага вяселля.

Пераклад з англійскай Валянціна Хітраво-Шмырова. Рэжысёр-пастаноўшчык Наталля Башава.

Узроставае абмежаванне - 18+. Спектакль ідзе на рускай мове.

Квіткі - у касе тэатра (тэл. 62-63-81) альбо на сайце kvitki.by.

6 сакавіка (18:00)  - яшчэ адна камедыя сучаснага англійскага драматурга Рэя Куні «КЛІНІКА».

У прадчуванні свята ў цэнтральнай лонданскай клініцы пануе мітусня. Галоўны герой Дэвід Морцімер — вядучы неўролаг буйнога лонданскага шпіталя, праз гадзіну яму трэба  рабіць важны, вырашальны для кар'еры даклад на міжнароднай медыцынскай канферэнцыі, але тут на яго галаву «звальваецца» былая каханка і паведамляе яму, што ў іх ёсць агульны 18-гадовы сын і ён жадае пазнаёміцца з бацькам. Катастрофа! Трэба тэрмінова шукаць выйсце з гэтай сітуацыі. Каб не загрымець у паліцыю, захаваць шлюб, сяброў, службовае становішча і кар'еру — герой вымушаны бясконца выкручвацца! Увогуле — поўная клініка!

Папулярны англійскі драматург-камедыёграф Рэй Куні спецыялізуецца на забаўляльных камедыях. Поспех пастановак па яго п'есах прадказальны — драматург па-майстэрску яднае сюжэтныя анекдатычныя хітраспляценні з розыгрышамі і жартамі. Займальная і захапляльная гісторыя дорыць гледачам зарад дадатных эмоцый і новыя яркія ўражанні.

Пераклад і сцэнічная рэдакцыя Міхаіла Мішына. Рэжысёр-пастаноўшчык Наталля Башава.

Узроставае абмежаванне - 12+. Спектакль ідзе на рускай мове.

Квіткі - у касе тэатра (тэл. 62-63-81) альбо на сайце kvitki.by.

Чакаем вас у тэатры!