КОЛАСАЎЦАЎ ЧАКАЮЦЬ У ГОМЕЛІ

90-ы сезон, юбілейны, Нацыянальнага акадэмічнага драматычнага тэатра імя Якуба Коласа працягваецца. І вось нарэшце коласаўцы выязджаюць у першыя ў гэтым сезоне гастролі: з 15 па 18 кастрычніка тэатр пакажа свае спектаклі на сцэне Гомельскага абласнога драматычнага тэатра.

Жыхары горада над Сожам пабачаць трагікамедыю «Пахавайце мяне за плінтусам» паводле аднайменнай аўтабіяграфічнай аповесці расійскага пісьменніка Паўла Санаева. Рэжысёр – заслужаны дзеяч мастатцваў Рэспублікі Беларусь, мастацкі кіраўнік тэатра Валерый Анісенка. Спектакль з гучным рэзанансам прайшоў на віцебскай сцэне і зараз збірае поўныя залы.

Яшчэ адна пастаноўка для гомельчан, – камедыя «Да трэціх пеўняў» паводле аднайменнай аповесці Васіля Шукшына. Рэжысёр-пастаноўшчык – Міхась Краснабаеў. Дастаткова новы спектакль, але яго паспелі ўпадабаць і дарослыя, і дзеці.

На гомельскай сцэне свае выключныя вакальныя здольнасці артысты Коласаўскага тэатра прадэманструюць у мюзікле-памфлеце «Дыліжанс» Уладзіміра Кандрусевіча. Лібрэта напісана Леанідам Філатавым паводле навэлы Гі дэ Мапасана «Пышка». Рэжысёр спектакля Сяргей Кулікоўскі. У пастаноўцы занятыя як старэйшыя акцёры, так і маладое пакаленне тэатра.

Для дзяцей у Гомелі Коласаўскі тэатр прапануе спектакль «Як воўк мамай быў» Васіля Ткачова. Сюжэт вядомы дзякуючы мультфільму. Рэжысёр спектакля – заслужаны артыст Рэспублікі Беларусь, акцёр тэатра імя Якуба Коласа Вячаслаў Грушоў.

Спадзяемся, што гомельскаму гледачу спадабаюцца коласаўскія пастаноўкі.

Любіце Коласаўскі тэатр так, як ён любіць вас!
Сачыце за афішай!